*** ၇င်ခွင်လမ်း သို့ လာေ၇ာက်လည်ပတ် လေ့လာကြသူ မိတ်ဆွေအားလုံး စိတ်၏ ချမ်းသာခြင်း ကိုယ်၏ ကျမ်းမာခြင်းတို့နှင့် အေးချမ်း ပြည့်စုံနိုင်ကြပါစေ ***

Wednesday 17 July 2013

လောကီ အကျိုးစီပွား နှင့် လောကုတ္တ၇ာ ချမ်းသာေ၇းအတွက် မိတ်ဆွေကောင်းနှစ်မျိုး



ယနေ့ကမ္ဘာ့လူသား အပေါင်းတို့သည် အသိပညာနှင့် အတတ်ပညာများ တိုးတက်လာ သည်နှင့်အမျှ လူအချင်းချင်း ဆက်ဆံရေးသည်လည်း ပို၍ပို၍ နက်ရှိုင်း လာခဲ့သည်။ လူအချင်းချင်း ပေါင်းသင်း ဆက်ဆံရေးကို အခိုင်မြဲဆုံး ဖွဲ့နှောင်ထားသည်မှာ မေတ္တာပင် ဖြစ်သည်။ မေတ္တာဖြင့် ပေါင်းသင်း ဆက်ဆံတတ်သူကို မည်သူမျှ အဆက်မဖြတ် လိုကြဘဲ ဝေးနေ သည့်တိုင်အောင် တွေ့လိုမြင်လို အားထားလိုသော ဆန္ဒဖြင့် တမ်းတနေ ကြမည် ဖြစ်သည်။

မေတ္တာသမား အများစုသည် အနစ်နာခံ တတ်ကြသူများ ဖြစ်ခြင်းကြောင့် မေတ္တာတရား အမြဲထားသူသည် 

 
အရှုံးနှင့်သာ ကြုံတွေ့ရမည်ဟု ဆိုကြပြန်သည်။ မေတ္တာသည် မိမိထား နိုင်သည့် အတိုင်းအတာ အတွင်း၌သာ ပုံမှန်ထား ရမည်ဖြစ်ရာ အစွန်းရောက်သည် အထိ မေတ္တာထားလွန်း သူများအဖို့ လောကီအမြင်တွင် အရှုံးနှင့်သာ ရင်ဆိုင်ရမည်ဖြစ်သည်။ မေတ္တာတရားသည် သတ္တဝါအားလုံးအပေါ် ချစ်ခင်စာနာစိတ်ဖြင့် အကျိုး စီးပွားကိုလို လားသည့် သဘောတရား ဖြစ်သည်။ မေတ္တာသည် ပါရမီဆယ်ပါးတွင် တစ်ပါးအပါအဝင် ဖြစ်သော်လည်း သံသရာမှ လွတ်မြောက် နိုင်သည့် ပညာ ပါရမီကဲ့သို့ အမြင့်ဆုံး အထွတ်အထိပ် မဟုတ်ပေ။ မေတ္တာ၏ အကျိုးအာနိသင် များမှာ ချမ်းသာစွာ အိပ်ရခြင်း၊ ချမ်းသာစွာ နိုးရခြင်း၊ မကောင်းသော အိပ်မက်များ မမြင်မက်ခြင်း၊ လူတို့ ချစ်ခင်ကြခြင်း၊ နတ်တို့ ချစ်ခင်ကြခြင်း၊ နတ်တို့က စောင့်ရှောက်ခြင်း၊ မီးဘေး အဆိပ်ဘေးနှင့် လက်နက် ဘေးတို့ မထိရှခြင်း၊ စိတ်တည်ကြည်ခြင်း၊ မျက်နှာကြည်လင်ခြင်း၊ မတွေမဝေ သေရခြင်း၊ နောက်ဆုံးအဆင့် မဂ်ဥာဏ်ကို ထိုးထွင်းသိမြင် နိုင်ခြင်းတို့ဖြစ်သည်။
လူသည် ကိုယ့်အကျိုးစီးပွားကို အကြိမ်ပေါင်းများစွာ မည်မျှဆောင် ကြဉ်းခဲ့သည်ဖြစ်စေ မိမိအကြိုက် တစ်ကြိမ်တစ်ခါ မလိုက်လျောသည်နှင့် ရန်သူသဖွယ် သဘောထားတတ် ကြပြန်သည်။ အခက်အခဲ တွေ့စဉ်၊ ဒုက္ခရောက်စဉ်၊ စိတ်ဓာတ်ကျနေစဉ် အတွင်း ကြိမ်ဖန်များစွာ ကူညီခဲ့ဖူး သော်လည်း တစ်ကြိမ်တစ်ခါ မလိုက်လျောမိလျှင်မူ ရန်သူသဖွယ် သဘော ထားတတ်ကြသည်။ ထို့ကြောင့် လူ့အကြိုက်ကို နတ်မလိုက်နိုင်ဟု ဆိုကြ ခြင်းဖြစ်သည်။ လူ့သဘော လူ့မနောသည် နားလည်ရန် ခက်ခဲခြင်းကြောင့် လူသာမန် အများစု၌ ထိုကဲ့သို့ စိတ်သဘော ရှိကြသည်မှာ အပြစ်တင် ရန်မလိုပေ။ လူအချင်းချင်း ကြင်နာစိတ်၊ ကရုဏာစိတ်၊ စာနာစိတ်၊ အချင်းချင်း ကူညီရိုင်းပင်း စိတ်များ ကင်းမဲ့သွားလျှင် သူတစ်ပါးအပေါ် မုဒိတာပွားလို စိတ်များ မဖြစ်ပေါ် နိုင်တော့ပေ။
လူ့လောကသည် အကောင်းနှင့် အဆိုး ဒွန်တွဲလျက် ရှိနေခြင်းကြောင့် ကောင်းသူများရှိသလို မကောင်းသူများလည်း ရှိမည်။ ကောင်းသော မိတ်ဆွေ၊ ကောင်းသော လုပ်ဖော်ကိုင်ဖက် ရှိသည့်နည်းတူ မကောင်းသော မိတ်ဆွေ၊ မကောင်းသော လုပ်ဖော်ကိုင်ဖက် တွေလည်း တွေ့ရမည်။ မိမိအကျိုး ရလဒ်ကို အဟန့်အတား ပြုသူနှင့်မိမိအား စိတ်အနှောင့် အယှက် ဖြစ်စေသူတို့ကြောင့် လူအားလုံး မကောင်းဟု ညည်းညူနေရန် မသင့်ပေ။
မိမိဖြတ် သန်းခဲ့ရသော ဘဝခရီးတစ်လျှောက်တွင်  ယခုအသက်  အရွယ်အထိ မိတ်ဆွေ ကောင်း မည်ရွေ့မည်မျှ ရှိခဲ့သည်ကို ပြန်လည် ဆန်းစစ်ကြည့်ပါက သိနိုင်ကြမည် ဖြစ်သည်။ သူတော်မှ ကိုယ်ကောင်း မဖြစ်စေဘဲ ကိုယ်ကောင်းမှ သူတော်မည်ကို သတိပြုကြရန်နှင့် သူတော်၍ ကိုယ်ကောင်းပြီး ကိုယ်တော်၍ ကိုယ်ကောင်းမှသာ ဘဝခရီး ဖြောင့်ဖြူးမည်ဟု ပညာရှိများ မိန့်မှာခဲ့ကြသည်။
သို့ဖြစ်၍ လူအချင်းချင်း ပေါင်းသင်း ဆက်ဆံရေးတွင် လောကသားများ၏ အကျိုးစီးပွားကို ဖြစ်စေတတ်သည့် လောကီ ဗဟုသုတ အကြား အမြင်ကို ပေးသော  မိတ်ဆွေနှင့် လောကုတ္တရာ အတွက် ချမ်းသာနိုင်သည့် လောကုတ္တရာ ဗဟုသုတ အကြားအမြင်ကို ပေးသော မိတ်ဆွေဟူသော မိတ်ဆွေကောင်း နှစ်မျိုးကိုသာ မေတ္တာထား၍ ရှာဖွေပေါင်းသင်း ဆက်ဆံ ကြရမည် ဖြစ်ပေသည်။   ။
                      
                                                             မြ၀တီသတင်း မှ ကူးယူဖေါ်ပြသည်.......

No comments:

Post a Comment