နေ့စဉ်ကြုံတွေ့နေရသည့် အခက်အခဲ သို့မဟုတ် ရန်ကုန်မြို့၏ ယာဉ်ကြောပိတ်ဆို့မှု ပြဿနာ

ရန်ကုန်မြို့တွင် ဘတ်စ်ကားစီး အခြေခံ လူတန်းစားမှစ၍ ကိုယ်ပိုင်ကားစီး ချမ်းသာကြွယ်ဝသော လူတန်းစားအဆုံး လူတန်းစား အမျိုးမျိုး ယခုအများဆုံး ရင်ဆိုင်တွေ့ကြုံနေရသော အခက်အခဲ တစ်ရပ်မှာ ကားလမ်းများ အဆမတန် ပိတ်ဆို့နေပြီး နေရာတစ်နေရာမှ တစ်နေရာသို့ အလွယ်တကူ သွားလာနိုင်ခြင်း မရှိဘဲ ခက်ခဲနေရခြင်းပင် ဖြစ်သည်။

ယာဉ်ကြောပိတ်ဆို့မှု ပိုမိုဆိုးရွား လာရခြင်း၏ အကြောင်းရင်းများ ထဲတွင် ယာဉ်အစီးရေ များပြားလာခြင်းသည်လည်း အကြောင်းရင်းတစ်ရပ် ဖြစ်သည်။ သို့ရာတွင် ရန်ကုန်မြို့၏ ကားအစီးရေ ပမာဏသည် လူတစ်ထောင်လျှင် ခုနစ်စီးနှုန်းသာရှိပြီး အရှေ့တောင် အာရှတွင် ကားစီးရေ သိပ်သည်းမှု အနည်းဆုံး ဖြစ်ပါသည်။

  မြန်မာ့အိမ်နီးချင်း ထိုင်းနိုင်ငံတွင်ပင် ကားစီးရေ သိပ်သည်းမှုသည် လူတစ်ထောင်လျှင် ၁၆၅ စီးနှုန်း ရှိနေပြီ ဖြစ်ပါသည်။ ထိုသို့ ကားသိပ်သည်းဆခြင်း နှိုင်းယှဉ်ပါက အဆ ၂၀ ခန့် ကွာဟနေသော်လည်း ယာဉ်ကြောပိတ်ဆို့မှု ပမာဏမှာမူ ထိုင်းနိုင်ငံထက် မြန်မာနိုင်ငံတွင် ပို၍ပင် ဆိုးရွားနေ သယောင် ဖြစ်နေ ပါသည်။ ထိုသို့ ဖြစ်ရခြင်းမှာ လိုအပ်သည့် အခြေခံ အဆောက်အအုံများ နည်းပါးခြင်းက အဓိက အကြောင်းရင်း ဖြစ်သည်။

 တင်သွင်းလိုက်သည့် ကားအစီးရေ ပမာဏနှင့် အဆင်ပြေအောင် လမ်းအခြေခံ အဆောက်အအုံ များကို တိုးချဲ့ပြင်ဆင်ခြင်း မပြုဘဲ အလျင်စလို ကားအစီးပေါင်းများစွာ တင်သွင်းခွင့် ပြုလိုက်သည့် အတွက် ယာဉ်ကြောပိတ်ဆို့မှု ဒဏ်ကို ပြည်သူများ ပိုမိုခံစားလာရသည်။ အထူးသဖြင့် မြို့စွန်နေရာများတွင် နေထိုင်သော အခြေခံ လူတန်းစားများ အနေဖြင့် ပိုမိုခံစားကြရပြီး လက်လုပ်လက်စား တစ်ဦးအနေဖြင့် အလုပ်သွား အလုပ်ပြန်အတွက် သက်သက်ပင် တစ်နေ့လျှင် လေးနာရီခန့်အထိ အသုံးပြုနေရသည်။

ယခင်ကတည်းက ပိတ်ဆို့နေသော ကားလမ်းမများသည် ယခုလို မိုးရာသီတွင်တော့ ကားလမ်းမ ရေလျှံမှုများ ဖြစ်ပေါ်နေပြီး ယာဉ်ကြောပိတ်ဆို့မှုကြောင့် သွားရေးလာရေး ဆိုးရွားစွာ ခက်ခဲနေကြရသည်။ နှစ်စဉ် ကားလမ်းရေလျှံမှုကို ဖြေရှင်းနိုင်ရန် ကွန်ကရစ်လမ်းမများ တိုးချဲ့လာခဲ့သော် လည်း ယခုနှစ်တွင်လည်း ကားလမ်းမ ရေလျှံမှုများနှင့် ယာဉ်ကြောပိတ်ဆို့မှုများကို ဖြေရှင်းနိုင်ခြင်း မရှိသေးပါ။ အချိန်ဆိုသည်မှာ အဖိုးထိုက်တန်သော အရာအဖြစ် သတ်မှတ်ထားသည်ဆိုလျှင် ရန်ကုန်မြို့နေ ပြည်သူလူထုမှာ နေ့စဉ်နေ့တိုင်း တန်ဖိုးရှိလှသည့် အချိန်များကို အဆုံးရှုံးခံ နေကြရသူများ ဖြစ်ပါသည်။ ထို့ပြင် လူမှုရေး၊ စီးပွားရေး၊ ပညာရေး စသည့်အရာများတွင်လည်း အချိန်ဆုံးရှုံးမှု၏ နောက်ဆက်တွဲအဖြစ် ဆုံးရှုံးကြရသည်။

ရန်ကုန်မြို့၏ ယာဉ်ကြောပိတ်ဆို့မှု ပြဿနာကို သာမန်မည်ကာမတ္တ ပြဿနာလေး တစ်ခုဟု ထင်မြင်ယူဆ၍ မရနိုင်ပါ။ ယာဉ်ကြောပိတ်ဆို့မှုကြောင့် အသက်ပေါင်းများစွာ ဆုံးရှုံးသွားနိုင်သည်။ အိမ်ခြေပေါင်းများစွာ ပြာကျသွားနိုင်သည်။ အပြစ်ရှိသော ရာဇ၀တ်သားပေါင်းများစွာ လွတ်မြောက်ထွက်ပြေး သွားနိုင်သည်။ လူတစ်ဦးချင်း တစ်ယောက်ချင်း ဆုံးရှုံးမှုများမှ နိုင်ငံတော်အဆင့် အဆုံးအရှုံးများ အထိ ဖြစ်ပွားသွားနိုင်သည်။ 

ယာဉ်ကြောပိတ်ဆို့မှုများကို ဖြေရှင်းနိုင်ရေး တာဝန်ရှိသူများ အနေဖြင့် လက်ပူတိုက် ဖြေရှင်းနည်းမျိုးများသည် ရေရှည်အလုပ်မဖြစ်နိုင်ပါ။ ထို့ကြောင့် တိုးတက်များပြားလာသော ကားအစီးရေနှင့် ကိုက်ညီအောင် လမ်းအခြေခံ အဆောက်အအုံများကို တိုးချဲ့ပြင်ဆင်ခြင်း မပြုရသေးမီတွင် ၀န်နှင့်အား မမျှမှု ပိုမိုဆိုးရွားလာခြင်း မရှိစေရန် ကားတင်သွင်းမှုများကို ကန့်သတ်ထိန်းသိမ်းထားခြင်း၊ ရေလျှံမှု၏ အဓိက အကြောင်းရင်းကို ဖြေရှင်းရန်အတွက် ရေနုတ်မြောင်းများ တိုးချဲ့ခြင်း၊ ရေစီးရေလာကောင်းအောင် ပြုပြင်ခြင်း၊ ယာဉ်စည်းကမ်း လမ်းစည်းကမ်း လိုက်နာမှု အားကောင်းလာစေရန် စီမံကိန်းချ ပြုလုပ်ခြင်း အစရှိသည် တို့သည်သာ ယာဉ်ကြောပိတ်ဆို့မှု အခြေအနေကို တကယ်တမ်း ဖြေရှင်းနိုင်မည့် နည်းလမ်းများဖြစ်ကြောင်း The Daily Eleven သတင်းစာက ယူဆရေးသား အပ်ပါသည်။

 စက်တင်ဘာလ ၂၅ ရက်နေ့ထုတ် The Daily Eleven သတင်းစာ၏ #အယ်ဒီတာ့အာဘော်