ဘ၀များရဲ့ ပဲ့ကိုင်ရှင်
လူရေစီးကြောင်းကြီးသည် လောကခရီးရှည်ကို အလျှဉ်မပြတ်လျှောက်လှမ်းနေကြသည်။ ယင်းစီးကြောင်းထဲတွင်
နိုင်ငံလိုက် လူမျိုးလိုက်၊ ဒေသလိုက်၊ မိသားစုလိုက်မှသည် တကိုယ်တည်း လျှောက်လှမ်းနေ သည်များလည်း ပါ၏။ သူတို့၏ ဘ၀ဖြစ်စဉ်သမိုင်းများကား ကျွန်တော်တို့ သင်ယူမဆုံးသော စာအုပ်ကြီး များပင်မဟုတ်ပါလား။ ယင်းစာအုပ်ကြီးများက ကျွန်တော်တို့အား မင်းတို့ငါ့ကို ဖတ်ကြစမ်းပါဟု မည်သည့် အခါမျှ မတိုက်တွန်း။ ဖတ်ချင်သူများကိုလည်း မဖတ်ပါနှင့်ဟု မဟန့်တား။ ဖတ်ရှုကာ သင်ခန်းစာယူတတ် သူပညာယူတတ်သူများမှာကား အကျမနာဘဲ သူများထက်အမြဲတမ်း တစ်ပန်းသာနေတတ်သည်။
ကမ္ဘာ့သမိုင်းကို လေ့လာလိုက်စားမည်ဆိုပါက ခေါင်းဆောင်ကောင်းများ အုပ်ချုပ်ခဲ့သည့် တိုင်းပြည်များနှင့် မင်းဆိုးမင်းညစ်များ အုပ်ချုပ်ခံခဲ့ရသော တိုင်းပြည်များ၏ သမိုင်းရာဇ၀င်သည် မည်သို့ ကွဲပြားခြားနားသည်ကို
မြင်တွေ့ရမည် အမှန်ပင်ဖြစ်၏။
လူမျိုးတစ်မျိုး သို့မဟုတ် ဒေသတစ်ခု သို့မဟုတ် မိသားစုတစ်စု၏ ဂုဏ်သတင်းထွန်းပြောင်ခြင်းသည် လည်းကောင်း။ ဂုဏ်သရေ ညှိုးနွမ်းခြင်းသည်လည်းကောင်း သူတို့ကိုယ်တိုင် မိမိတို့၏ ဂုဏ်သိက္ခာနှင့် မိမိတို့၏ တန်ဖိုးကို ကျကျနန ထိန်းသိမ်းစောင့်ရှောက်နိုင်စွမ်း ရှိမရှိဆိုသည်က အခရာကျကြောင်း သိလာ ပေလိမ့်မည်။ အလားတူ တစ်ဦးချင်း အတွက် မူကား ကိုယ်ပိုင်စည်းကမ်းနှင့် ရည်မှန်းချက် ပန်းတိုင်သို့ ပေါက်ရောက်အောင် အားထုတ် နိုင်စွမ်း ရှိခြင်း မရှိခြင်းက အဓိကကျကြောင်း ပြောပြမည်မှာမလွဲ။
သို့သော် ယင်းစာအုပ်ကြီးများကို သေသေချာချာလေ့လာဖတ်ရှုသူကား နည်းပါးလှ၏။ နည်းပါးလှသည့် အထဲတွင် ဝေဖန်သုံးသပ်စိစစ်သူကား ပို၍ပင်ရှားပါးပါသေးသည်။
××× ××× ××× ××× ××× ×××
ဘန်ကောက်မြို့လယ်ရှိ ချစ်သောမြန်မာကျောင်းမှ ကျောင်းအုပ်ကြီး၏ရုံးခန်းသို့ ကျွန်တော် သွားရောက် လည်ပတ်ရာ ယင်းကျောင်းမှ ကျောင်းသားစိုးနိုင်နှင့် ဆုံမိကြသည်။ သူကား ဆရာကြီး၏ လက်စွဲတော်ဖြစ်၏။ အလုပ်သမားအရေး ဆောင်ရွက်ရာတွင်စေတနာ့ဝန်ထမ်းအဖြစ် တက်ကြွစွာ လုပ်ဆောင်နေသူလည်း ဖြစ်သည်။ ချစ်သောမြန်မာ ကျောင်းကို ဦးစီးဖွင့်လှစ်ထားသော မိခင်အဖွဲ့အစည်းမှာ ထိုင်းမြန်မာ မဟာမိတ်ဖောင်ဒေးရှင်း
ဖြစ်၏။ ယင်းဖောင်ဒေးရှင်းသည် ထိုင်းနိုင်ငံအနှံ့အပြားရှိ မြန်မာအလုပ်သမားများ ဗဟု သုတရရှိစေရန် ရည်ရွယ်၍ အလုပ်သမားရေးရာစာစဉ်ကို ကာလကြာမြင့်စွာ ထုတ်ဝေခဲ့ဖူးပါသည်။ လွန်ခဲ့သော ခုနစ်လခန့်ကမှ ငွေရေး
ကြေးရေး အခက်အခဲကြောင့် ဆက်မထုတ်နိုင်ဘဲ ရပ်တန့်နေ၏။ ယင်းစာစောင်၏ နောက်ဆုံးအယ်ဒီတာကား ကျွန်တော်ကိုယ်တိုင် ဖြစ်သည်။
ကျောင်းအုပ်ကြီးနှင့် ကျွန်တော်တို့ နှစ်ယောက်သည်စာစောင်ကို အသက်ပြန်သွင်းချင်ကြသည်။ သို့သော် ထောက်ပံ့ မည့် အလှူရှင်ကား မည်သူဖြစ်လေမည်နည်း အတိအကျမသိ။ ထို့ကြောင့် ကျောင်းအုပ်ကြီးတွင်ရှိသော ထောင်နှင့် ချီသည့် ကျောင်းသားများ၏အားနှင့် စာစောင်ကိုပြန်အသက်သွင်းရန် ကျွန်တော်ကအကြံပြုသည်။
“ဒီလိုလုပ်ဗျာ။ ခင်ဗျား ဒီတစ်ခေါက်ကျောင်းဖွင့်ရင် ကြော်ငြာသင်ပုန်းကြီးမှာ အလုပ်သမားရေးရာ စာစောင်
ဖြစ်မြောက်ရး ကော်မတီအသစ်ဖွဲ့စည်းမည်။ စိတ်ပါဝင်စားသော ကျောင်းသားကျောင်းသူများ ဆက်သွယ်ပါလို့
ကြော်ငြာလိုက်ဗျာ။ ထောင်ချီတဲ့ ကျောင်းသားထဲက အနည်းဆုံး ဆယ်ဂဏန်းလောက် တော့ပါလာကြပါလိမ့်မယ်။ အဲဒီကော်မတီကနေ ကျောင်းသားတွေကြားမှာရော အလုပ်သမားတွေရှိတဲ့ နေရာတွေမှာ ထပ်ပြီးစည်းရုံး လှုံ့ဆောင်ကြပါလိမ့်မယ်။ ပြီးရင် ကြော်ငြာတွေရလာအောင် လုပ်ကြမယ်။ မကောင်းဘူးလား ကျောင်းဆရာ” “ခင်ဗျားပြောတာ ဆိုးတော့မဆိုးပါဘူး။ ကြိုးစားကြည့်ကြတာပေါ့။ ကဲ ဟေ့ကောင်၊ စိုးနိုင်၊ ဆရာဌေးပြောတာ ဘယ့်နှယ်လဲ။ ဖြစ်နိုင်ပါ့မလား” ဟု ကျောင်းဆရာကြီးက စိုးနိုင် ဘက်သို့လှည့်ကာ မေးလေသည်။ ထိုအခါ စိုးနိုင်က “မလွယ်ဘူးထင်တယ်ဆရာ။ တချို့ ဆရာတွေက ဒါမျိုးလုပ်တာကို သိပ်မကြိုက်ကြဘူး။ မကြိုက်ရုံတင်မက အပြစ်ပါ
ပြောသေးတဲ့ဆရာမျိုးလည်း ရှိသေးတယ်” ဟု ဖြေရာသူ့ဆရာကြီးက “ဟုတ်တယ် ဆရာဌေး ရ၊ ကျောင်း တည်ထောင် တဲ့ ၁၀ နှစ်ပြည့် အခမ်းအနားလုပ်လို့ တချို့ကျောင်းသားတွေ စာမေးပွဲရှုံးတော့ ဆရာတချို့က ဒီလိုအများနဲ့ ဆိုင်တဲ့ အလုပ်မျိုး လုပ်တာကို မကြိုက်တဲ့အကြောင်း စာသင်ခန်းထဲမှာ ဗြောင်ပြောတဲ့ဆရာလည်း ရှိတာအမှန်ဘဲ၊ သူတို့ကလည်း ခရေဇီတစ်မျိုး ရှိတယ်ဗျာ” ဟု ဆိုသည်။
ထိုအခါ ကျွန်တော်က စိုးနိုင်အား “ဒါဖြင့် မင်းကိုငါတစ်ခုမေးမယ်ကွာ။ ခု မင်းဆရာနဲ့ ငါနဲ့ ဆွေးနွေးနေတဲ့ ကိစ္စက မလုပ်သင့်တဲ့ ကိစ္စလား။ လုပ်သင့်တဲ့ကိစ္စလားဆိုတာကို အရင်ဖြေကြည့်ပါ”
“လုပ်တာတော့ လုပ်သင့်တဲ့အလုပ်ပါ။ လုပ်သင့်လို့လည်း အရင်နှစ်များစွာကတည်းက လုပ်လာခဲ့တာပဲလေ။ အခု အလှူရှင်မရှိတော့လို့ ရပ်သွားတာပဲ မဟုတ်လား။ ကောင်းတဲ့အလုပ်တိုင်း လူတိုင်း လုပ်ချင်ကြတာပဲ။ ကောင်းတာ လုပ်ဖို့ လူတိုင်းဆန္ဒရှိပါတယ် ဆရာ”
“အိုကေ” မင်းအဖြေထဲမှာ မေးခွန်းဖြစ်စေတဲ့အရာ ထပ်ပါပြန်တယ်။ လူတိုင်းဟာ ကောင်းတာကိုလုပ်ချင်တဲ့ ဆန္ဒရှိကြတယ် ဆိုတယ်မဟုတ်လား။ ငါတို့စိတ်ထဲမှာ ဟိုဟာလေးဖြစ်ချင်တယ်။ ဒီဟာလေး ဖြစ်ချင်တယ်။ သူများတွေ ဖြစ်မြောက်အောင်မြင်တာတွေကိုတွေ့ရင်၊ အားကျအထင်ကြီးစရာတွေကို တွေ့ရင် ကိုယ်လည်း သူတို့လိုပဲ ဖြစ်ချင်ကြတာပဲ မဟုတ်လား။ ဒါပေမဲ့ ဖြစ်ချင်ရုံနဲ့ ငါတို့ ဖြစ်လို့ရတတ်လား။
“ဘယ်လိုလုပ်ရပါ့မလဲဆရာ။ ဖြစ်လာဖို့အတွက် ကြိုးစားမှရမှာပေါ့။ လိုချင်တဲ့အရာ ဘယ်ဟာမှ မိုးပေါ်က ကျလာ တယ်ဆိုတာ မရှိပါဘူးဆရာ။ ဒါနဲ့ ဆရာ့ကိုပြန်မေးချင်တယ်။အောင်မြင်မှုအတွက် ဘာတွေ ကျွန်တော်တို့ မှာ လိုအပ်ပါသလဲဗျာ”
“သင်္ဘောတွေကို မင်းတွေ့ဖူးတယ် မဟုတ်လား။ ဒီသင်္ဘောတွေ ပင်လယ်သမုဒ္ဒရာတွေကိုဖြတ်ပြီး လိုရာ ခရီးထိ ပေါက်ရောက်အောင် အဓိကကျတဲ့သူဟာ မာလိန်မှူးဘဲမဟုတ်လား။ ဒီလိုပဲ ကိုယ်ဖြစ်ချင်တဲ့ အရာတစ်ခု ကို ဖြစ်မြောက်အောင်မြင်အောင် လုပ်ဖို့ အတွက် အဓိကကျသူဟာ မိမိကိုယ်တိုင်ပဲ ဖြစ်တယ်လေ။ ဖြစ်ချင်တဲ့ ဆန္ဒတစ်ခုရှိလာရင် စိတ်ကူးယဉ်နေရုံနဲ့တော့ ဘာမှဖြစ်လာမှာ မဟုတ်ဘူးကွ။ ဖြစ်ချင် စိတ်ကို တစ်ဆင့်တင်ပြီး ရည်ရွယ်ချက်၊ ရည်မှန်းချက်အဖြစ် သတ်မှတ်ရမယ်။ ရည်မှန်းချက်ဆိုတဲ့ ပန်းတိုင်တစ်ခုကို တည်ဆောက်ပြီးမှ အဲဒီပန်းတိုင်ကို ပေါက်မြောက်ဖို့ဘာတွေလိုအပ်မလဲ။ ဘာတွေပြင်ဆင် ရမလဲ။ အချိန်ကာလ ဘယ်လောက်
ပေးရမလဲ။အရင်းအနှီး ဘယ်လောက်စိုက်ထုတ်ရမလဲ။ ရည်မှန်းချက် ပေါက်မြောက်ပြီးတဲ့အခါ အကျိုးရလဒ်က ဘယ်လောက်ကြီးမားသလဲ စသဖြင့်ရှင်းရှင်းလင်းလင်းသိနေဖို့ လိုတယ်ကွ။ ကြိုးစားချင်စိတ် ဆိုတာ အောင်မြင်မှု အသီးအပွင့်ကို အသေအချာမသိဘဲ ဘယ်လိုမှမပြင်းထန် မတက်ကြွဘူးကွ”
“ဟုတ်ကဲ့ ကျေးဇူးတင်ပါတယ်ဆရာ။ ကျွန်တော် သဘောပေါက်ပါပြီ။ အခု ဆရာတို့ ဆွေးနွေးနေကြတဲ့ စာစောင်
ပြန်လည်ထုတ်ဝေနိုင်ရေးအတွက် ကျွန်တော်လည်း တတ်နိုင်တဲ့ဘက်က တစ်တပ်တစ်အား ပါဝင် ဆောင်ရွက်ပါ့မယ် ဆရာ” ဟု ဆိုလေသည်။
××× ××× ××× ××× ×××
ယနေ့ခေတ်ကာလ မြန်မာလူငယ်အများစုကား ပဲ့မပါသောလှေ၊ သင်္ဘောများနှင့် ပမာတူ၏။ အချို့ကား ချွေး တလုံးလုံး သံတလုံးလုံး နှင့်လှေဦးတည့်ရာကို လှော်ခတ်နေကြ၏။ အချို့ကား ရွက်လွှင့်ရာဘက်သို့ မျောပါနေကြ၏။ အချို့မှာကား တက်လည်းမပါ ရွက်လည်းမရှိဘဲ တ၀ဲဝဲလည်ဖြင့် ဦးတည်ရာမဲ့နေသူများ လည်းမရှားလှ။ ထိုသူများ ကား တိကျပြတ်သားသော အနာဂတ်ပန်းတိုင်မဲ့လျှက် ဘ၀ရေစီးတွင် ရော ထွေးမျောပါနေကြလေသည်။
မြတ်စွာဘုရားရှင်က “အတ္တာဟိအတ္တနော နာထော” ဟု ရှင်းလင်းစွာ ဟောကြားသွန်သင်ဆုံးမတော်မူခဲ့သည်။ ဆိုလိုသည်မှာ “မိမိ ဘ၀အတွက်၊ မိမိကိုယ်ကိုယ်သာ အားကိုးရာ”သို့မဟုတ် မိမိဘ၀၏ ပဲ့ကိုင်ရှင် အစစ်မှာ မိမိသာ လျှင် ဖြစ်ချေသည်။
မိမိကိုယ်ကိုယ် ပဲ့ကိုင်နိုင်ဖို့ မိမိကိုယ်တိုင်မှာ ပြတ်သားရှင်းလင်းသော ပန်းတိုင်တစ်ခု ရှိကိုရှိရမည်။ ရည် မှန်းချက် ပန်းတိုင်ကို ရောက်ဖို့ပြင်ဆင်စရာများ လိုအပ်ချက်များ အရင်းအနှီးများစသည်တို့ကို ပြည့်စုံ အောင် မလွဲမသွေ
ဖြည့်ဆည်းရမည်။ ထို့ပြင် ရှေ့ကအောင်မြင်မှုပန်းတိုင်သို့ မရောက်ရောက်အောင် ချီတက်ခဲ့ကြသူများ၏ အတွေ့ အကြုံများကို လေ့လာမှတ်သားကာ အားကျအတုယူရမည်။ ယနေ့ခေတ် လူသားများ ရရှိခံစားနေကြရသော
ကောင်းကျိုးမှန်သမျှသည် ရည်မှန်းချက်ကြီးမားသူ လူတော်ကြီးများ၊ လူစွမ်းကောင်းကြီးများ၏ ကြိုးစားအားထုတ်မှု
ကြောင့် ဖြစ်သည်။
လူစီးကြောင်းကြီးထဲတွင် ကျွန်တော်တို့သည် အများနည်းတူ ဖြတ်သန်းသွားလာနေကြဆဲ။ စီးမျောနေကြဆဲ။ ဘယ်သူက မိမိဘ၀ကို အောင်မြင်အောင် ပဲ့ကိုင်နိုင်သူဖြစ်သနည်း ဆိုသည်ကိုကား ဗေဒင်ဆရာကို မေးရန်မဟုတ်။ ခိုင်မာပြတ်သားသော ဘ၀ရည်မှန်းချက်၊ ဘ၀ စီမံချက်များ ရှိမရှိကိုသာ ကိုယ့်ဖာသာ မေးပါလေ။
သင်တို့ ကျွန်တော်တို့ရှေ့က ကြယ်ကြီးများကား တိကျပြတ်သားသော ရည်မှန်းချက်များကို ချမှတ်လျှက် တက်စုံရွက်ကုန်လွှင့်ကာ အောင်မြင်မှုပန်းတိုင်သို့ ရောက်အောင် ပဲ့ကိုင်မောင်းနှင်ခဲ့ကြပြီး ဖြစ်သည်။ သူတို့ ရေးထိုး စိုက်ထူခဲ့သော အောင်မြင်မှုများသည် မွှေးပျံ့သော သမိုင်းရာဇ၀င်များအဖြစ် တည်တံ့နေ ကြသည် မဟုတ်ပါလော။ ယင်းသမိုင်းရာဇ၀င်များကား ကျွန်တော်တို့အတွက် အကောင်းဆုံးလမ်းညွှန်များနှင့် အကောင်းဆုံး စိတ်ဓာတ် ခွန်အားများပင် ဖြစ်ပါပေသည်။ ။
မဇ္ဈိမ မှမျှဝေဖေါ်ပြသည်....
No comments:
Post a Comment